బీజాపూర్: ఛత్తీస్ గఢ్ జిల్లాలోని బీజాపూర్ నైరుతి భాగంలో భద్రతా దళాలతో జరిగిన ఎన్‌కౌంటర్‌లో నలుగురు నక్సలైట్లు మృతి చెందినట్లు ఛత్తీస్‌గఢ్ పోలీసులు శనివారం తెలిపారు. మావోయిస్టుల గురించి నిర్దిష్ట సమాచారంతో భద్రతా దళాలు ఆ ప్రాంతంలో కూంబింగ్ ఆపరేషన్ చేపట్టగా నక్సల్ కాల్పులు జరపడంతో ఎదురు కాల్పులు చోటుచేసుకున్నాయని, ఆపరేషన్ ఇంకా కొనసాగుతోందని సమాచారం.
ఎన్కౌంటర్ స్థలం నుండి INSAS, SLR రైఫిల్స్‌తో సహా పెద్ద మొత్తంలో ఆయుధాలను, మందుగుండు సామగ్రిని స్వాధీనం చేసుకున్నట్లు ఇన్‌స్పెక్టర్ జనరల్ ఆఫ్ పోలీస్ (బస్తర్ రేంజ్) పి. సుందర్‌రాజ్ తెలిపారు. “ఇప్పటివరకు, ఎన్కౌంటర్ స్థలంలో నలుగురు మావోయిస్టుల మృతదేహాలు లభించాయని, కాల్పులు ఇంకా కొనసాగుతున్నాయి” అని ఐజీ తెలిపారు.
ఈ ఎన్కౌంటర్ తో ఈ సంవత్సరం ఛత్తీస్‌గఢ్‌లో 225 మంది నక్సలైట్లను భద్రతా దళాలు మట్టుబెట్టాయని, వందల మంది లోంగిపోయారని ఐజీ తెలిపారు. మార్చి 31, 2026 నాటికి దేశాన్ని నక్సలిజం నుండి విముక్తి చేయాలని కేంద్ర హోంమంత్రి అమిత్ షా భద్రతా సంస్థలను ఆదేశించారని, ఆ లోపు రాష్ట్రాన్ని నక్సల్ విముక్తి ప్రాంతంగా మారుస్తామని ఐజీ అన్నారు.
